|
Sunday of the First Class |
Liturgical colour: purple |
Psalms as for Sundays
Antiphon 1: In illa die * stillabunt montes dulcedinem, et colles fluent lac et mel, alleluia.
Antiphon 2: Jucundare * filia Sion, et exsulta satis, filia Jerusalem, alleluia.
Antiphon 3: Ecce Dominus veniet, * et omnes Sancti ejus cum eo: et erit in die illa lux magna, alleluia.
Antiphon 4: Omnes sitientes, * venite ad aquas: quaerite Dominum, dum inveniri potest, alleluia.
Antiphon 5: Ecce veniet * Propheta magnus, et ipse renovabit Jerusalem, alleluia.
Chapter:
Romans 13,11
Fratres: Hora est jam nos de somno surgere: nunc enim propior est nostra salus, quam cum credidimus.
Hymn:
Creator alme siderum,
Aeterna lux credentium,
Jesu, Redemptor omnium,
Intende votis supplicum.
Qui daemonis ne fraudibus
Periret orbis, impetu
Amoris actus, languidi
Mundi medela factus es.
Commune qui mundi nefas
Ut expiares, ad crucem
E Virginis sacrario
Intacta prodis victima.
Cujus potestas gloriae,
Nomenque qui cum primum sonat,
Et caelites et inferi
Tremente curvantur genu.
Te deprecamur ultimae
Magnae diei Judicem,
Armis supernae gratiae
Defende nos ab hostibus.
Virtus, honor, laus, gloria
Deo Patri cum Filio,
Sancto simul Paraclito,
In saeculorum saecula.
Amen.
Versicle:
V. Rorate caeli desuper, et nubes pluant justum.
R. Aperiatur terra, et germinet Salvatorem.
Magnificat Antiphon:
Ne timeas, Maria, * invenisti enim gratiam apud Dominum: ecce concipies, et paries filium, alleluia.
Collect:
Excita, quaesumus, Domine, potentiam tuam, et veni: ut ab imminentibus peccatorum nostrorum periculis, te mereamur protegente eripi, te liberante salvari: Qui vivis et regnas cum Deo Patre in unitate Spiritus Sancti Deus, per omnia saecula saeculorum. Amen.