Pontifex infantem, vel infantes, sive pueros, sacri Baptismatis unda immergere, seu perfundere volens, solitis indumentis in Secretario, vel alibi, ad ejus libitum, pluvialique violacei coloris, et mitra simplici paratus, et baculo Pastorali accepto, Capellanis, vel aliis Presbyteris, et Clericis, superpelliceis indutis, qui ei assistant ac ministrent, praecedentibus, ad Ecclesiae portam, extra quam exspectant, qui infantes baptizandos detulerunt, procedit: ibique, deposito baculo, sedet cum mitra in faldistorio, ad ejusdem portae limen, cum strato, et violacea veste praeparato. Sicque sedens cum mitra, interrogat infantem, positum super brachium dextrum illius, qui eum defert, illum nomine proprio, eidem imposito, appellando, et dicens: (Si plures fuerint baptizandi, dicat singulariter singulis).
N. Quid petis ab Ecclesia Dei?
Patrinus respondet: Fidem.
Pontifex: Fides quid tibi praestat?
Patrinus respondet: Vitam aeternam.
(Etiam singulariter singulis).
Pontifex: Si igitur vis ad vitam ingredi, serva mandata: Diliges Dominum
Deum
tuum ex toto corde tuo, et ex tota anima tua, et ex tota mente tua, et proximum
tuum sicut teipsum.
Deinde surgat cum mitra, et ter exsufflet leniter in
faciem infantis, et dicat semel: (Singulariter singulis).
Exi ab eo (vel
ab ea),
immunde spiritus, et da locum Spiritui Sancto Paraclito.
Postea sedeat cum mitra, et pollice faciat signum crucis in fronte, et in
pectore infantis dicens:
Accipe signum Crucis tam in fronte + quam in corde
+: sume fidem coelestium praeceptorum, et talis esto moribus, ut templum Dei jam esse possis.
Surgat inde, deposita mitra, et, stans dicat orationem manibus junctis, quod etiam in reliquis orationibus observet. (In plurali pro omnibus).
Oremus.
Preces nostras, quaesumus, Domine, clementer exaudi, et hunc electum tuum N. Crucis Dominicae impressione signatum, perpetua virtute custodi: ut magnitudinis gloriae tuae rudimenta servans, per custodiam mandatorum tuorum ad regenerationis gloriam pervenire mereatur. Per Christum Dominum nostrum. R. Amen.
(Singulariter singulis). Deinde imponat manum super caput infantis, et adhuc sine mitra dicat: (In plurali pro omnibus).
Oremus.
Omnipotens sempiterne Deus, Pater Domini nostri Jesu Christi, respicere dignare super hunc famulum tuum N. quem ad rudimenta fidei vocare dignatus es: omnem caecitatem cordis ab eo expelle; disrumpe omnes laqueos satanae, quibus fuerat colligatus; aperi ei, Domine, januam pietatis tuae, ut, signo sapientiae tuae imbutus, omnium cupiditatum foetoribus careat, et ad suavem odorem praeceptorum tuorum laetus tibi in Ecclesia tua deserviat, et proficiat de die in diem. Per eumdem Christum Dominum nostrum. R. Amen.
Deinde benedicturus sal (quod semel benedictum alias ad eumdem usum deservire potest) accepta mitra, stans dicat: (Sine mutatione pro omnibus).
BENEDICTIO SALIS.
Exorcizo te, creatura salis, in nomine Dei Patris omnipotentis +, et in caritate Domini nostri Jesu Christi +, et in virtute Spiritus Sancti +, exorcizo te per Deum vivum +, per Deum verum +, per Deum sanctum +, per Deum +, qui te ad tutelam humani generis procreavit, et populo venienti ad credulitatem per servos suos consecrari praecepit, ut in nomine sanctae Trinitatis efficiaris salute Sacramentum ad effugandum inimicum.
Hic deponat mitram, et adhuc stans prosequatur:
Proinde rogamus te, Domine Deus noster, ut hanc creaturam salis sanctificando sanctifices +, et benedicendo benedicas + , ut fiat omnibus accipientibus perfecta medicina, permanens in visceribus eorum, in nomine ejusdem Domini nostri Jesu Christi, qui venturus est judicare vivos, et mortuos, et saeculum per ignem. R. Amen.
Deinde sedeat cum mitra, et accipiens modicum salis benedicti, immittat in os
infantis dicens: (Singulariter singulis).
N. Accipe sal sapientiae: propitiatio sit tibi in vitam aeternam. R. Amen.
Pontifex: Pax tecum.
R. Et cum spiritu tuo.
Surgat inde, deposita mitra, et dicat: (In plurali pro omnibus).
Oremus.
Deus patrum nostrorum, Deus universae conditor veritatis, te supplices exoramus, ut hunc famulum tuum N. respicere digneris propitius, et hoc primum pabulum salis gustantem, non diutius esurire permittas, quo minus cibo expleatur coelesti; quatenus sit semper spiritu fervens, spe gaudens, tuo semper nomini serviens. Perduc eum, Domine, quaesumus, ad novae regenerationis lavacrum, ut cum fidelibus tuis promissionum tuarum aeterna praemia consequi mereatur. Per Christum Dominum nostrum. R. Amen.
Accepta mitra, adhuc stans, dicit Exorcismum.
Exorcizo te, immunde spiritus, in nomine Pa + tris, et Fi + lii, et Spiritus + Sancti, ut exeas, et recedas ab hoc famulo Dei N. Ipse enim tibi imperat, maledicte damnate, qui pedibus super mare ambulavit, et Petro mergenti dexteram porrexit. Ergo, maledicte diabole, recognosce sententiam tuam, et da honorem Deo vivo, et vero, da honorem Jesu Christo, Filio ejus, et Spiritui Sancto: et recede ab hoc famulo Dei N. quia istum sibi Deus, et Dominus noster Jesus Christus ad suam sanctam gratiam et benedictionem, fontemque Baptismatis vocare dignatus est.
Retenta mitra, adhuc stans, et pollice in fronte signans infantem, dicit: (Singulariter
singulis).
Et hoc signum sanctae Cru + cis, quod nos fronti ejus
damus, tu, maledicte diabole, numquam audeas violare. Per eumdem Christum Dominum nostrum.
R. Amen.
(Singulis). Mox, deposita mitra, et adhuc stans, impositaque manu super caput infantis, dicit: (In plurali pro omnibus).
Oremus.
Aeternam, ac justissimam pietatem tuam deprecor, Domine sancte, Pater omnipotens,
aeterne Deus, auctor luminis, et veritatis, super hunc famulum tuum N. ut
digneris illum illuminare lumine intelligentiae tuae: munda eum, et sanctifica:
da ei scientiam veram, ut dignus gratia Baptismi tui effectus teneat firmam spem,
consilium rectum, doctrinam sanctam. Per Christum Dominum nostrum. R. Amen.
Accipit mitram, et imposita extrema parte stolae
super infantem, introducit eum in Ecclesiam, praecedentibus omnibus, qui cum eo
venerant, dicens
(In plurali pro omnibus).
N. Ingredere in templum Dei ut habeas partem cum Christo in vitam
aeternam. R. Amen.
Cum fuerint Ecclesiam ingressi, Pontifex deponit mitram, et procedens ad fontem,
usque ad cancellos exclusive, cum susceptoribus, dicit clara voce simul cum
illis:
Credo in Deum, Patrem omnipotentem, creatorem coeli et terrae. Et in Jesum
Christum, Filium ejus unicum, Dominum nostrum. Qui conceptus est de
Spiritu
Sancto, natus ex Maria Virgine. Passus sub Pontio Pilato, crucifixus, mortuus,
et sepultus:
descendit ad inferos, tertia die resurrexit a mortuis, ascendit ad coelos, sedet
ad dexteram Dei Patris omnipotentis: inde venturus est judicare vivos et mortuos.
Credo in Spiritum Sanctum, sanctam Ecclesiam Catholicam, Sanctorum communionem,
remissionem peccatorum, carnis resurrectionem, vitam aeternam. Amen.
Pater noster, qui es in coelis, sanctificetur nomen tuum: adveniat regnum tuum:
fiat voluntas tua sicut in coelo, et in terra. Panem nostrum quotidianum da
nobis hodie; et dimitte nobis debita nostra, sicut et nos dimittimus debitoribus
nostris et ne nos inducas in tentationem; sed libera nos a malo. Amen.
Deinde accipit mitram, et priusquam accedat ad Baptisterium, terga vertens ad ipsum, extra cancellos, dicat versus infantem:
EXORCISMUS.
Exorcizo te, omnis spiritus immunde, in nomine Dei Patris omnipotentis +, et in nomine Jesu Christi, Fulii ejus, Domini et judicis nostri +, et in virtute Spiritus Sancti +, ut discedas ab hoc plasmate Dei. N. quod Dominus noster ad templum sanctum suum vocare dignatus est, ut fiat templum Dei vivi, et Spiritus Sanctus habitet in eo. Per eumdem Christum Dominum nostrum, qui venturus est judicare vivos et mortuos, et saeculum per ignem. R. Amen.
Mox cum mitra, et adhuc stans, digito accipiat de saliva oris sui, et tangat aures, et flares infantis. Tangendo vero aurem dexteram, et sinistram, dicat (Singulariter singulis). Ephphetha, quod est, adaperire.
Deinde tangat nares, dicens: In odorem suavitatis. Tu autem effugare, diabole, appropinquabit enim judicium Dei.
Postea sedens ibidem cum mitra, interrogat baptizandum nominatim, dicens:
N. Abrenuntias satanae?
Patrinus respondet: Abrenuntio.
Pontifex: Et omnibus operibus ejus?
Respondet Patrinus: Abrenuntio.
Pontifex: Et omnibus pompis ejus?
Respondet Patrinus: Abrenuntio.
Deinde Pontifex adhuc sedens cum mitra, intingit pollicem in oleo Catechumenorum, et infantem ungit in pectore, et inter scapulas, in modum crucis, dicens semel: Ego te linio + oleo salutis in Christo Jesu Domino nostro, ut habeas vitam aeternam. R. Amen.
Deinde pollicem, et inuncta loca abstergit bombacio, vel re simili. Mox
depositis mitra simplici, pluviali et stola violaceis, accipit stolam, et
pluviale albi coloris, et mitram auriphrygiatam, et tunc ingreditur Capellam
Baptisterii, ubi, sedens ante ostium Fontis, interrogat, expresso nomine,
baptizandum, Patrino respondente: N. Credis in Deum Patrem omnipotentem, creatorem coeli et terrae?
Patrinus respondet: Credo.
Pontifex: Credis in Jesum Christum, Filium ejus unicum, Dominum nostrum, natum,
et passum?
Patrinus respondet: Credo.
Pontifex: Credis in Spiritum Sanctum, sanctam Ecclesiam Catholicam, Sanctorum
communionem, remissionem peccatorum, carnis resurrectionem vitam aeternam?
Patrinus respondet: Credo.
Subinde, expresso nomine baptizandi, Pontifex adhuc sedens cum mitra, dicit: N.
Vis baptizari?
Patrinus respondet: Volo.
Si baptizet per immersionem, Pontifex mitram retinens, surgit, et accipit
infantem: et advertens ne laedatur, caute caput ejus immergit in aquam,
et trina mersione baptizans, semel tantum dicit:
N. Ego te baptizo in nomine Pa + tris, et Fi +
lii, et Spiritus + Sancti.
Mox Patrinus, vel Matrina, vel uterque simul infantem de sacro Fonte levant
suscipientes illum de manu Pontificis.
Si vero Pontifex per infusionem baptizet, Patrino, vel Matrina, vel utroque (si
ambo admittantur) infantem tenente, Pontifex, adhuc sedens cum mitra vasculum,
vel urceolum accipit cum aqua baptismali,. et aiiquo Capellano lancem supponente
ad recipiendam aquam, ter de ea fundit super caput infantis in modum Crucis, et
simul verba proferens, semel tantum distincte et attente dicit:
N. Ego te baptizo in nomine Pa + tris, fundat primo,
et Fi + lii, fundat
secundo, et Spiritus + Sancti, fundat
tertio.
Si vero dubitatur, an infans fuerit baptizatus, utatur hac forma:
N. Si non es baptizatus, ego te baptizo in nomine Pa +
tris, et Fi + lii, et
Spiritus + Sancti.
(Singulis). Deinde Pontifex sedens, et retinens mitram, intingit pollicem in
sacro Chrimate, et
ungit infantem in summitate capitis in modum crucis, dicens:
Deus omnipotens, Pater Domini nostri Jesu Christi, qui te regeneravit ex aqua, et
Spiritu Sancto, quique dedit tibi remissionem omnium pecca torum, (hic inungit)
ipse te liniat Chrismate salutis + in eodem Christo Jesu Domino nostro in vitam
aeternam. R. Amen.
Pontifex: Pax tibi. R.
Et cum spiritu tuo.
Tum bombacio, aut re simili, abstergit pollicem suum, et locum inunctum. Deinde
etiam sedens cum mitra: imponit capiti infantis linteolum candidum, loco vestis
albae, dicens:
Accipe vestem candidam, quam immaculatam perferas ante tribunal Domini nostri
Jesu Christi, ut habeas vitam aeternam. R. Amen.
Postea, pariter sedendo cum mitra, dat infanti, vel Patrino, candelam accensam,
dicens:
Accipe lampadem ardentem, et irreprehensibilis custodi Baptismum tuum; serva Dei
mandata, ut cum Dominus venerit ad nuptias, possis occurrere ei, una cum omnibus
Sanctis, in aula coelesti, habeasque vitam aeternam et vivas in saecula
saeculorum. R. Amen.
Postremo dicit, etiam sedendo cum mitra:
N. Vade in pace, et Dominus sit tecum. R. Amen.
Ac demum, sedens adhuc cum mitra, moneat susceptores de spirituali cognatione, quam contraxerunt cum baptizato baptizatique patre, et matre; et de obligatione, quam habent, ubi opus fuerit, opportune docendi baptizatum tamquam filium spinitualem, fidei rudimenta; unde ad hujusmodi munus, qui ea ignorant, non admittantur.
Si vero fuerint plures baptizandi, masculi, seu feminae, in Catechismo masculi statuantur ad dexteram, feminae vero ad sinistram; omnia pariter dicantur, ut supra in proprio genere, et in numero plurali. Quod si fuerint masculi et feminae simul baptizandi, omnia dicantur in numero plurali, sed in genere masculino, etiam si sint plures feminae, quam masculi.
Quaedam vero non in numero plurali pro omnibus, sed in numero singulari pro singulis dici oportet; in genere tamen masculino pro masculis, et in genere femineo pro feminis, ut notatur in Rituali Romano in rubrica post Baptismum parvulorum; sed nos pro majori commoditate adnotavimus in propriis locis in rubricis parenthesi notatis, ita ut, quando dicitur in tali rubrica: Singulariter singulis, intellige quod illa verba, vel actiones usque ad aliam rubricam dici vel fieri debent singulariter singulis, et primum masculis, deinde feminis, mutato solum genere, ut dictum est supra. Quando vero in simili rubrica dicitur: In plurali pro omnibus, intellige quod illa verba usque ad aliam rubricam dici debent semel, sed pro omnibus in plurali, mutato solum genere, si omnes sint feminae.
Pontifex demum, completo baptismate, sedens adhuc cum mitra, lavat manus more solito; et inde eodem comitatu, eodemque modo, quo baptizaturus accessit, eo, unde venerat, revertitur.