Finito sermone, Diaconus qui cantavit Evangelium, conversus ad Episcopum stantem cum mitra, cantabit confessionem in tono prout habetur in Rituali Romano, et dum dicet
tibi Pater, et te Pater, si fuerit Canonicus profunde se inclinabit, si non fuerit Canonicus, genuflectet.
Finita Confessione per Diaconum, Episcopus sedet, et sermocinator, qui in pulpito dum cantatur Confessio genuflectet, surgens publicabit Indulgentiam in forma sequenti, videlicet:
Reverendissimus in Christo Pater et Dominus, Dominus N.
Dei et Apostolicae Sedis gratia hujus sanctae N. Ecclesiae Episcopus, dat, et concedit omnibus hic praesentibus quadraginta dies de vera Indulgentia in forma Ecclesiae consueta.
Rogate Deum pro felici statu Sanctissimi Domini nostri N.
divina Providentia Papae N. Dominationis suae Reverendissimae, et sanctae Matris Ecclesiae.
Publicata Indulgentia, Episcopus, deposita mitra, surget et leget ex libro in tono Orationis versus populum, ut infra:
Precibus, et meritis beatae Mariae semper Virginis, beati Michaelis Archangeli, beati Joannis Baptistae, Sanctorum Apostolorum Petri et Pauli, et omnium Sanctorum, misereatur vestri omnipotens Deus, et dimissis peccatis vestris, perducat vos ad vitam aeternam.
R. Amen.
Indulgentiam, absolutionem, et remissionem peccatorum vestrorum tribuat vobis omnipotens, et misericors Dominus.
R. Amen.
Deinde reassumpta mitra, benedicens populo more consueto, dicet:
Et benedictio Dei omnipotentis Pa + tris, et Fi +
lii, et Spiritus + Sancti descendat super vos, et maneat semper.
R. Amen.
Si autem erit Archiepiscopus, statim publicata Indulgentia, Capellanus portabit ante illum Crucem, quam genuflexus tenebit, et Archiepiscopus surgens, deposita mitra, prius Cruci caput profunde
inclinabit, et deinde adhuc stans prosequetur
Precibus, etc. et sic, detecto capite, solemniter benedicet.