Die praecedenti ponuntur in coemeterio benedicendo quinque ligneae cruces, videlicet una altior in medio, et quatuor aliae, quaelibet ad staturam hominis, quarum una in extremitate coemeterii ante crucem mediam, alia in alia extremitate coemeterii retro crucem mediam, tertia in tertia extremitate a dextris, et quarta in quarta extremitate coemeterii a sinistris crucis mediae: et ante quamlibet ex dictis quinque crucibus ponitur seu figitur in terram aliquod lignum in ejus summitate aptum ad affigendum illi tres candelas, trium unciarum quamlibet, vel circa; scala super quam ascendens Pontifex possit attingere summitates ipsarum crucem; vas magnum aqua plenum benedicenda; et vas cum sale.
Mane vero Pontifex in sacristia paratus amictu, alba, cingulo, stola, pluviali albi coloris, mitra simplici, et baculo Pastorali, accedit cum ministris ad coemeterium benedicendum, ubi faldistorium ante crucem in medio positam sibi paratur, super quo residens facit populo brevem sermonem de sanctitate et libertate coemeterii.
Quo facto, affiguntur et accenduntur quindecim candelae, tres ante quamlibet crucem super ligna, ut supra ordinata; quibus ardentibus, Pontifex ante mediam crucem et candelas stans, deposita mitra, dicit:
Oremus.
Omnipotens Deus, qui es custos animarum, et tutela salutis, et
fides credentium, respice propitius ad nostrae servitutis officium; ut ad
introitum nostrum purgetur, bene + dicatur, sancti +
ficetur, et conse + cretur hoc coemeterium, ut
humana corpora hic post vitae cursum quiescentia, in magno judicii die simul cum
felicibus animabus mereantur adipisci vitae perennis gaudia. Per Christum Dominum
nostrum. R. Amen.
Et mox ante ipsam crucem super faldistorio Pontifex, accepta mitra, accumbit; et cantor incipit et prosequitur Litanias.
Kyrie, eleison.
Christe, eleison.
Kyrie, eleison.
Christe, audi nos.
Christe, exaudi nos.
Pater de coelis Deus, miserere nobis.
Fili Redemptor mundi Deus, miserere nobis.
Spiritus Sancte Deus, miserere nobis.
Sancta Trinitas unus Deus, miserere nobis.
Sancta Maria, ora pro nobis.
Sancta Dei Genitrix, ora pro nobis.
Sancta Virgo virginum, ora pro nobis.
Sancte Michael, ora pro nobis.
Sancte Gabriel, ora pro nobis.
Sancte Raphael, ora pro nobis.
Omnes sancti Angeli, et Archangeli, orate pro nobis.
Omnes sancti beatorum Spirituum ordines, orate pro nobis.
Sancte Joannes Baptista, ora pro nobis.
Sancte Joseph, ora pro nobis.
Omnes sancti Patriarchae, et Prophetae, orate pro nobis.
Sancte Petre, ora pro nobis.
Sancte Paule, ora pro nobis.
Sancte Andrea, ora pro nobis.
Sancte Jacobe, ora pro nobis.
Sancte Joannes, ora pro nobis.
Sancte Thoma, ora pro nobis.
Sancte Jacobe, ora pro nobis.
Sancte Philippe, ora pro nobis.
Sancte Bartholomaee, ora pro nobis.
Sancte Matthaee, ora pro nobis.
Sancte Simon, ora pro nobis.
Sancte Thadaee, ora pro nobis.
Sancte Mathia, ora pro nobis.
Sancte Barnaba, ora pro nobis.
Sancte Luca, ora pro nobis.
Sancte Marce, ora pro nobis.
Omnes sancti Apostoli, et Evangelistae, orate pro nobis.
Omnes sancti Discipuli Domini, orate pro nobis.
Omnes sancti Innocentes, orate pro nobis.
Sancte Stephane, ora pro nobis.
Sancte Laurenti, ora pro nobis.
Sancte Vincenti, ora pro nobis.
Sancte Fabiane et Sebastiane, ora pro nobis.
Sancte Joannes et Paule, ora pro nobis.
Sancte Cosma et Damiane, ora pro nobis.
Sancte Gervasi et Protasi, ora pro nobis.
Omnes sancti Martyres, orate pro nobis.
Sancte Silvester, ora pro nobis.
Sancte Gregori, ora pro nobis.
Sancte Ambrosi, ora pro nobis.
Sancte Augustine, ora pro nobis.
Sancte Hieronyme, ora pro nobis.
Sancte Martine, ora pro nobis.
Sancte Nicolae, ora pro nobis.
Omnes sancti Pontifices, et Confessores, orate pro nobis.
Omnes sancti Doctores, orate pro nobis.
Sancte Antoni, ora pro nobis.
Sancte Benedicte, ora pro nobis.
Sancte Bernarde, ora pro nobis.
Sancte Dominice, ora pro nobis.
Sancte Francisce, ora pro nobis.
Omnes sancti Sacerdotes, et Levitae, orate pro nobis.
Omnes sancti Monachi, et Eremitae, orate pro nobis.
Sancta Maria Magdalena, ora pro nobis.
Sancta Agatha, ora pro nobis.
Sancta Lucia, ora pro nobis.
Sancta Agnes, ora pro nobis.
Sancta Caecilia, ora pro nobis.
Sancta Catharina, ora pro nobis.
Sancta Anastasia, ora pro nobis.
Omnes sanctae Virgines et Viduae, orate pro nobis.
Omnes Sancti et Sanctae Dei, intercedite pro nobis.
Propitius esto, parce nobis, Domine.
Propitius esto, exaudi nos, Domine.
Ab omni malo, libera nos, Domine.
Ab omni peccato, libera nos, Domine
Ab ira tua, libera nos, Domine.
A subitanea et improvisa morte, libera nos, Domine.
Ab insidiis diaboli, libera nos, Domine.
Ab ira, et odio, et omni mala voluntate, libera nos, Domine.
A spiritu fornicationis, libera nos, Domine.
A fulgure et tempestate, libera nos, Domine.
A flagello terraemotus, libera nos, Domine.
A peste, fame, et bello, libera nos, Domine.
A morte perpetua, libera nos, Domine.
Per mysterium sanctae incarnationis tuae, libera nos, Domine.
Per adventum tuum, libera nos, Domine.
Per nativitatem tuam, libera nos, Domine.
Per baptismum, et sanctum jejunium tuum, libera nos, Domine.
Per crucem, et passionem tuam, libera nos, Domine.
Per mortem, et sepulturam tuam, libera nos, Domine.
Per sanctam resurrectionem tuam, libera nos, Domine.
Per admirabilem ascensionem tuam, libera nos, Domine.
Per adventum Spiritus Sancti paracliti, libera nos, Domine.
In die judicii, libera nos, Domine.
Peccatores, te rogamus, audi nos.
Ut nobis parcas, te rogamus, audi nos.
Ut nobis indulgeas, te rogamus, audi nos.
Ut ad veram poenitentiam nos perducere digneris, te rogamus, audi nos.
Ut Ecclesiam tuam sanctam regere, et conservare digneris, te rogamus, audi nos.
Ut Domnum apostolicum, et omnes ecclesiasticos ordines in sancta religione
conservare digneris, te rogamus, audi nos.
Ut inimicos sanctae Ecclesiae humiliare digneris, te rogamus, audi nos.
Ut Regibus, et Principibus christianis pacem et veram concordiam donare digneris,
te rogamus, audi nos.
Ut cuncto populo christiano pacem et unitatem largiri digneris, te rogamus, audi
nos.
Ut omnes errantes ad unitatem Ecclesiae revocare, et infideles universos ad
Evangelii lumen perducere digneris, te rogamus, audi nos.
Ut nosmetipsos in tuo sancto servitio confortare, et conservare digneris, te
rogamus, audi nos.
Ut mentes nostras ad coelestia desideria erigas, te rogamus, audi nos.
Ut omnibus benefactoribus nostris sempiterna bona retribuas, te rogamus, audi
nos.
Ut animas nostras, fratrum, propinquorum et benefactorum nostrorum ab aeterna
damnatione eripias, te rogamus, audi nos.
Ut fructus terrae dare, et conservare digneris, te rogamus, audi nos.
Ut omnibus fidelibus defunctis requiem aeternam donare digneris, te rogamus,
audi nos.
Pontifex surgit ab accubitu, et baculum Pastoralem in sinistra tenens, producit signum crucis super coemeterium, dicens primo:
Ut haec coemeterium purgare, et bene + dicere digneris. R. Te rogamus, audi nos.
Secundo dicit:
Ut haec coemeterium purgare, bene + dicere, et sancti + ficare digneris. R. Te rogamus, audi nos.
Tertio dicit:
Ut haec coemeterium purgare, bene + dicere, sancti + ficare, et conse + crare digneris. R. Te rogamus, audi nos.
Quo facto, redit ad accubitum, cantore Litanias perficiente.
Ut nos exaudire digneris, te rogamus, audi nos.
Fili Dei, te rogamus, audi nos.
Agnus Dei, qui tollis peccata mundi, parce nobis Domine.
Agnus Dei, qui tollis peccata mundi, exaudi nos Domine.
Agnus Dei, qui tollis peccata mundi, miserere nobis.
Christe, audi nos.
Christe, exaudi nos.
Kyrie, eleison.
Christe, eleison.
Kyrie, eleison.
Quibus finitis surgit cum mitra ab accubitu Pontifex, et stans juxta aquam ibidem in vase paratam, benedicit eam, et sal simpliciter, hoc modo:
V. Adjutorium nostrum in nomine Domini.
R. Qui fecit coelum et terram.
Exorcizo te, creatura salis, per Deum + vivum, per Deum + verum, per Deum + sanctum, per Deum, qui te per Eliseum Prophetam in aquam mitti jussit, ut sanaretur sterilitas aquae; ut efficiaris sal exorcizatum in salutem credentium; et sis omnibus sumentibus te sanitas animae et corporis; et effugiat, atque discedat a loco, in quo aspersum fueris, omnis phantasia et nequitia vel versutia diabolicae fraudis, omnisque spiritus immundus, adjuratus per eum qui venturus est judicare vivos et mortuos, et saeculum per ignem. R. Amen
Deinde depositis baculo Pastorali et mitra, junctis manibus dicit:
V. Domine, exaudi orationem meam.
R. Et clamor meus ad te veniat.
V. Dominus vobiscum.
R. Et cum spiritu tuo.
Oremus.
Immensam clementiam tuam, omnipotens aeterne Deus, humiliter imploramus, ut hanc
creaturam salis, quam in usum generis humani tribuisti, bene +
dicere, et sancti + ficare tua pietate
digneris; ut sit omnibus sumentibus salus mentis et corporis; et quidquid ex eo
tactum vel respersum fuerit, careat omni immunditia omnique impugnatione
spiritualis nequitiae. Per Dominum nostrum Jesum Christum Filium tuum, qui
tecum vivit, et regnat in unitate Spiritus Sancti Deus, per omnia saecula
saeculorum. R. Amen.
Tum acceptis mitra et baculo Pastorali, super aquam absolute dicit:
Exorcizo te, creatura aquae, in nomine Dei Pa + tris omnipotentis, et in nomine Jesu Christi Fi + lii ejus Domini nostri, et in virtute Sancti + Spiritus, ut fias aqua exorcizata ad effugandam omnem potestatem inimici, et ipsum inimicum eradicare et explantare valeas, cum angelis suis apostaticis, per virtutem ejusdem Domini nostri Jesu Christi, qui venturus est judicare vivos et mortuos, et saeculum per ignem. R. Amen.
Deinde, depositis baculo Pastorali et mitra, junctis manibus dicit:
V. Domine, exaudi orationem meam.
R. Et clamor meus ad te veniat.
V. Dominus vobiscum.
R. Et cum spiritu tuo.
Oremus.
Deus, qui ad salutem humani generis maxima quaeque Sacramenta in aquarum
substantia condidisti, adesto propitius invocationibus nostris, et elemento huic
multimodis purificationibus praeparato, virtutem tuae bene +
dictionis infunde; ut creatura tua mysteriis tuis serviens, ad
abjiciendos daemones, morbosque pellendos, divinae gratiae sumat effectum; ut
quidquid in domibus, vel in locis fidelium, haec unda resperserit, careat omni
immunditia, liberetur a noxa: non illic resideat spiritus pestilens, non aura
corrumpens: discedant omnes insidiae latentis inimici, et si quid est quod aut
incolumitati habitantium invidet, aut quieti, aspersione hujus aquae effugiat;
ut salubritas per invocationem sancti tui nominis expedita, ab omnibus sit
impugnationibus defensa. Per Dominum nostrum Jesum Christum Filium tuum,
qui tecum vivit, et regnat in unitate Spiritus Sancti Deus, per omnia saecula
saeculorum. R. Amen.
Pontifex mittit sal in aquam, in modum crucis, dicendo semel:
Commixtio salis, et aquae pariter fiat. In nomine Pa + tris, et Fi + lii, et Spiritus + Sancti. R. Amen.
V. Dominus vobiscum.
R. Et cum spiritu tuo.
Oremus.
Deus, invictae virtutis auctor, et insuperabilis imperii rex ac semper
magnificus triumphator, qui adversae dominationis vires reprimis, qui inimici
rugientis saevitiam superas, qui hostiles nequitias potenter expugnas, te,
Domine, trementes, et supplices deprecamur, ac petimus, ut hanc creaturam salis,
et aquae dignanter aspicias, benignus illustres, pietatis tuae rore sanctifices:
ut ubicumque fuerit aspersa, per invocationem sancti tui nominis, omnis
infestatio immundi spiritus abigatur, terrorque venenosi serpentis procul
pellatur, et praesentia Sancti Spiritus nobis misericordiam tuam poscentibus,
ubique adesse dignetur. Per Dominum nostrum Jesum Christum Filium tuum,
qui tecum vivit, et regnat in unitate Spiritus Sancti Deus, per omnia saecula
saeculorum. R. Amen.
Aqua igitur taliter benedicta, Pontifex accedens ad crucem ante mediam positam, mitra ibidem deposita, inchoat, schola prosequente, Antiphonam:
Asperges me, Domine, hyssopo, et mundabor: lavabis me, et super nivem dealbabor.
Psalmus 50.
Miserere mei, Deus: * secundum magnam misericordiam tuam.
Et secundum multitudinem miserationum tuarum: *dele iniquitatem meam.
Amplius lava me ab iniquitate mea: * et a peccato meo munda me.
Quoniam iniquitatem meam ego cognosco: * et peccatum meum contra me est semper.
Tibi soli peccavi, et malum coram te feci: * ut justificeris in sermonibus tuis
et vincas cum judicaris.
Ecce enim in iniquitatibus conceptus sum: * et in peccatis concepit me mater mea.
Ecce enim veritatem dilexisti: * incerta, et occulta sapientiae tuae
manifestasti mihi.
Asperges me hyssopo, et mundabor: * lavabis me et super nivem dealbabor.
Auditui meo dabis gaudium, et laetitiam: * exultabunt ossa humiliata.
Averte faciem tuam a peccatis meis: * et omnes iniquitates meas dele.
Cor mundum crea in me, Deus: * et spiritum rectum innova in visceribus meis.
Ne projicias me a facie tua: * et Spiritum Sanctum tuum ne auferas a me.
Redde mihi laetitiam salutaris tui: * et spiritu principali confirma me.
Docebo iniquos vias tuas: * et impii ad te convertentur.
Libera me de sanguinibus, Deus, Deus salutis meae: * exultabit lingua mea
justitiam tuam.
Domine, labia mea aperies: * et os meum annuntiabit laudem tuam.
Quoniam si voluisses sacrificium, dedissem utique: * holocaustis non
delectaberis.
Sacrificium Deo spiritus contribulatus: * cor contritum, et humiliatum, Deus,
non despicies.
Benigne fac, Domine, in bona voluntate tua Sion: * ut aedificentur muri
Jerusalem.
Tunc acceptabis sacrificium justitiae, oblationes et holocausta: * tunc imponent
super altare tuum vitulos.
Gloria Patri, et Filio: * et Spiritui Sancto.
Sicut erat in principio, et nunc, et semper: * et in saecula saeculorum. Amen.
Et repetitur Antiphona Asperges me.
Dum Antiphona et Psalmus dicuntur, Pontifex, accepta mitra, circuit et perambulat totum locum coemeterii, incipiens circuire ad ejus dexteram, aspergens aquam benedictam undique. Expleto autem circuitu, rediens ante crucem, quae est ante medium, deposita mitra, respiciens ad ipsam crucem, dicit
Oremus.
Deus, qui es totius orbis conditor, et humani generis redemptor, cunctarumque creaturarum visibilium, et invisibilium perfectus dispositor, te supplici voce ac puro corde exposcimus, ut hoc coemeterium sive polyandrum; in quo farnulorum famularumque tuarum corpora quiescere debent post curricula hujus vitae labentia, pur
+ gare, bene +
dicere, et sancti + ficare digneris; quique remissionem omnium peccatorum per tuam magnam misericordiam in te confidentibus praestitisti, corporibus quoque eorum in hoc coemeterio quiescentibus, et tubam primi Archangeli hic exspectantibus consolationem perpetuam largiter
impertire. Per Christum Dominum nostrum. R. Amen.
Deinde thurificat ipsam crucem, et figit in summitate ipsius unam ex tribus candelis ardentibus, et alias duas similiter ardentes in duobus brachiis ejusdem crucis. Quo facto, accepta mitra, accedit ad crucem retro mediam positam, aspergendo semper aquam benedictam per coemeterium, interim dicens cum ministris sequentes Psalmos:
Psalmus 6.
Domine, ne in furore tuo arguas me: * neque in ira tua corripias me.
Miserere mei, Domine, quoniam infirmus sum: * sana me, Domine, quoniam
conturbata sunt ossa mea.
Et anima mea turbata est valde: * et tu Domine usquequo?
Convertere, Domine, et eripe animam meam: * salvum me fac propter misericordiam
tuam.
Quoniam non est in morte qui memor sit tui: * in inferno autem quis confitebitur
tibi.
Laboravi in gemitu meo, lavabo per singulas noctes lectum meum: * in lacrimis
meis stratum meum rigabo.
Turbatus est a furore oculus meus: * inveteravi inter omnes inimicos meos.
Discedite a me, omnes qui operamini iniquitatem: * quoniam exaudivit Dominus
vocem fletus mei.
Exaudivit Dominus deprecationem meam: * Dominus orationem meam suscepit.
Erubescant et conturbentur vehementer omnes inimici mei: * convertantur, et
erubescant valde velociter.
Et non dicitur Gloria Patri.
Psalmus 31
Beati, quorum remissae sunt iniquitates: * et quorum tecta sunt peccata.
Beatus vir, cui non imputavit Dominus peccatum: * nec est in spiritu ejus dolus.
Quoniam tacui, inveteraverunt ossa mea: * dum clamarem tota die.
Quoniam die ac nocte gravata est super me manus tua: * conversus sum in aerumna
mea, dum configitur spina.
Delictum meum cognitum tibi feci: * et injustitiam meam non abscondi.
Dixi: confitebor adversum me injustitiam meam Domino: * et tu remisisti
impietatem peccati mei.
Pro hac orabit ad te omnis sanctus: * in tempore opportuno.
Verumtamen in diluvio aquarum multarum: * ad eum non approximabunt.
Tu es refugium meum a tribulatione, quae circumdedit me: * exsultatio mea, erue
me a circumdantibus me.
Intellectum tibi dabo, et instruam te in via hac, qua gradieris: * firmabo super
te oculos meos.
Nolite fieri sicut equus, et mulus: * quibus non est intellectus.
In camo, et fraeno maxillas eorum constringe: * qui non approximant ad te.
Multa flagella peccatoris: * sperantem autem in Domino misericordia circumdabit.
Laetamini in Domino, et exsultate, justi: * et gloriamini omnes recti corde.
Et non dicitur Gloria Patri.
Quibus expletis, Pontifex stans ante ipsam crucem, deposita mitra, dicit:
Oremus.
Domine sancte, Pater omnipotens, aeterne Deus, trina Majestas, et una Deitas, Pater, et Filius, et Spiritus Sanctus, justitiae auctor, veniae largitor, bonorum dator, sanctitatis origo, charismatum distributor, omniumque ad te venientium pius receptor: praesta propitius, ut hoc coemeterium, in honorem nominis tui compositum, bene
+ dici, et sancti + ficari concedas; qui beato Abrahae Patriarchae famulo tuo terram, a filiis Hebron comparatam, in sepulturam benedixisti; et qui populo Israelitico promissionis tellurem in aevo durantem concessisti, famulorum famularumque tuarum corporibus in hoc coemeterium intrantibus qui quietis sedem, et ab omni incursione malorum spirituum tutelam benignus largitor tribuas; ut post animarum, corporumque resurrectionem coadunatam, te donante atque concedente, beatitudinem sempiternam percipere mereantur, qui in Trinitate perfecta vivis et regnas Deus, per omnia saecula
saeculorum. R. Amen.
Tum thurificat ipsam crucem, et figit in summitate ejus unam ex tribus candelis ardentibus, et alias duas in duobus brachiis ejusdem crucis, et, accepta mitra, vadit ad crucem ad dexteram mediae positam, aspergendo aquam benedictam per coemeterium, et dicendo cum ministris sequentem Psalmum:
Psalmus 37
Domine, ne in furore tuo arguas me: * neque in ira tua corripias me.
Quoniam sagittae tuae infixae sunt mihi: * et confirmasti super me manum tuam.
Non est sanitas in carne mea a facie irae tuae: * non est pax ossibus meis a
facie peccatorum meorum.
Quoniam iniquitates meae supergressae sunt caput meum: * sicut onus grave
gravatae sunt super me.
Putruerunt, et corruptae sunt cicatrices meae: * a facie insipientiae meae.
Miser factus sum et curvatus sum usque ad finem: * tota die contristatus
ingrediebar.
Quoniam lumbi mei impleti sunt illusionibus: * et non est sanitas in carne mea.
Afflictus sum, et humiliatus sum nimis: * rugiebam a gemitu cordis mei.
Domine, ante te omne desiderium meum: * et gemitus meus a te non est absconditus.
Cor meum conturbatum est, dereliquit me virtus mea: * et lumen oculorum meorum,
et ipsum non est mecum.
Amici mei, et proximi mei: * adversum me appropinquaverunt, et steterunt.
Et qui juxta me erant, de longe steterunt: * et vim faciebant, qui quaerebant
animam meam.
Et qui inquirebant mala mihi, locuti sunt vanitates: * et dolos tota die
meditabantur.
Ego autem tamquam surdus non audiebam: * et sicut mutus non aperiens os suum.
Et factus sum sicut homo non audiens: * et non habens in ore suo redargutiones.
Quoniam in te, Domine, speravi: * tu exaudies me, Domine Deus meus.
Quia dixi: nequando supergaudeant mihi inimici mei: * et dum commoventur pedes
mei, super me magna locuti sunt
Quoniam ego in flagella paratus sum: * et dolor meus in conspectu meo semper.
Quoniam iniquitatem meam annuntiabo: * et cogitabo pro peccato meo.
Inimici autem mei vivunt, et confirmati sunt super me: * et multiplicati sunt
qui oderunt me inique.
Qui retribuunt mala pro bonis, detrahebant mihi: * quoniam sequebar bonitatem.
Ne derelinquas me, Domine Deus meus: * ne discesseris a me.
Intende in adjutorium meum: * Domine, Deus salutis meae.
Et non dicitur Gloria Patri.
Quo dicto, Pontifex stans ante ipsam crucem deposita mitra, dicit:
Oremus.
Domine Deus, pastor aeternae gloriae, lux et honor sapientiae, custos et vigor prudentiae, salus aegrotantium, valetudo potentium, moestorum solamen, vita justorum, gloria humilium; te supplices flagitamus, ut hoc servorum tuorum coemeterium ab omni spurcitiae inquinamento et immundorum spirituum insidiis custodire, mundare, et bene
+ dicere digneris, atque corporibus humanis in hunc locum advenientibus sinceritatem perpetuam tribuere non desinas, ut quicumque Baptismi Sacramentum perceperint, et in fide Catholica usque ad vitae terminum perseverantes fuerint, atque decursu hujus aevi termino, corpora sua in hoc coemeterio requiei commendaverint, angelicis tubis concrepantibus, animae simul cum corporibus praemia coelestium gaudiorum percipiant
sempiterna. Per Christum Dominum nostrum. R. Amen.
Psalmus 101
Domine, exaudi orationem meam: * et clamor meus ad te veniat.
Non avertas faciem tuam a me: * in quacumque die tribulor, inclina ad me aurem
tuam.
In quacumque die invocavero te: * velociter exaudi me.
Quia defecerunt sicut fumus dies mei: * et ossa mea sicut cremium aruerunt.
Percussum est ut foenum, et aruit cor meum: * quia oblitus sum comedere panem
meum.
A voce gemitus mei: * adhaesit os meum carni meae.
Similis factus sum pellicano solitudinis: * factus sum sicut nycticorax in
domicilio.
Vigilavi: * et factus sum sicut passer solitarius in tecto.
Tota die exprobrabant mihi inimici mei: * et qui laudabant me, adversum me
jurabant.
Quia cinerem tamquam panem manducabam: * et potum meum cum fletu miscebam.
A facie irae et indignationis tuae: * quia elevans allisisti me.
Dies mei sicut umbra declinaverunt: * et ego sicut foenum arui.
Tu autem, Domine, in aeternum permanes: * et memoriale tuum in generationem et
generationem.
Tu exsurgens misereberis Sion: * quia tempus miserendi ejus, quia venit tempus.
Quoniam placuerunt servis tuis lapides ejus: * et terrae ejus miserebuntur.
Et timebunt Gentes nomen tuum, Domine: * et omnes reges terrae gloriam tuam.
Quia aedificavit Dominus Sion: * et videbitur in gloria sua.
Respexit in orationem humilium: * et non sprevit precem eorum.
Scribantur haec in generatione altera: * et populus, qui creabitur, laudabit
Dominum.
Quia prospexit de excelso sancto suo: * Dominus de caelo in terram aspexit.
Ut audiret gemitum compeditorum: * ut solveret filios interemptorum.
Ut annuntiet in Sion nomen Domini: * et laudem suam in Jerusalem.
In conveniendo populos in unum: * et reges ut serviant Domino.
Respondit ei in via virtutis suae: * paucitatem dierum meorum nuntia mihi.
Ne revoces me in dimidio dierum meorum: * in generationem et generationem anni
tui.
Initio tu, Domine, terram fundasti: * et opera manuum tuarum sunt coeli.
Ipsi peribunt, tu autem permanes: * et omnes sicut vestimentum veterascent.
Et sicut opertorium mutabis eos, et mutabuntur: * tu autem idem ipse es, et anni
tui non deficient.
Filii servorum tuorum habitabunt: * et semen eorum in saeculum dirigetur.
Et non dicitur Gloria Patri.
Quo dicto, stans ante ipsam crucem deposita mitra, dicit:
Oremus.
Domine Jesu Christe, qui corpus humanum de terra pro anglica reparatione formasti, et in te pro redemptione assumpsisti, in terram pro conditione carnis resolvis, et de terra pro immortalitate resuscitabis: hanc terram, quaesumus, ad usum sepulturae de benedictione tui sepulti corporis conse
+ crare dignare; et in Baptismate tibi consepultos, in natura carnis hic consepeliendos, sub spe tuae resurrectionis in tuae redemptionis misericordia requiescere
concede. Qui venturus es judicare vivos et mortuos, et saeculum
per ignem. R. Amen.
Tum thurificat ipsam crucem, et figit in ejus summitate unam de tribus candelis ardentibus, et alias duas in duobus brachiis ejusdem crucis; et, accepta mitra, revertitur ad crucem mediam, aspergendo semper per coemeterium aquam benedictam, dicendo cum ministris sequentes Psalmos :
Psalmus 129
De profundis clamavi ad te, Domine: * Domine, exaudi vocem meam.
Fiant aures tuae intendentes: * in vocem deprecationis meae.
Si iniquitates observaveris, Domine: * Domine, quis sustinebit?
Quia apud te propitiatio est: * propter legem tuam sustinui te, Domine.
Sustinuit anima mea in verbum ejus: * speravit anima mea in Domino.
A custodia matutina usque ad noctem: * speret Israel in Domino.
Quia apud Dominum misericordia: * et copiosa apud eum redemptio.
Et ipse redimet Israel: * ex omnibus iniquitatibus ejus.
Et non dicitur Gloria Patri.
Psalmus 142
Domine, exaudi orationem meam, auribus percipe obsecrationem meam in veritate
tua: * exaudi me in tua justitia.
Et non intres in judicium cum servo tuo: * quia non justificabitur in conspectu
tuo omnis vivens.
Quia persecutus est inimicus animam meam: * humiliavit in terra vitam meam.
Collocavit me in obscuris sicut mortuos saeculi: * et anxiatus est super me
spiritus meus, in me turbatum est cor meum.
Memor fui dierum antiquorum, meditatus sum in omnibus operibus tuis: * in factis
manuum tuarum meditabar.
Expandi manus meas ad te: * anima mea sicut terra sine aqua tibi.
Velociter exaudi me, Domine: * defecit spiritus meus.
Non avertas faciem tuam a me: * et similis ero descendentibus in lacum.
Auditam fac mihi mane misericordiam tuam: * quia in te speravi.
Notam fac mihi viam, in qua ambulem: * quia ad te levavi animam meam.
Eripe me de inimicis meis, Domine, ad te confugi: * doce me facere voluntatem
tuam, quia Deus meus es tu.
Spiritus tuus bonus deducet me in terram rectam: * propter nomen tuum, Domine,
vivificabis me in aequitate tua.
Educes de tribulatione animam meam: * et in misericordia tua disperdes inimicos
meos.
Et perdes omnes, qui tribulant animam meam: * quoniam ego servus tuus sum.
Et non dicitur Gloria Patri.
Quo dicto, Pontifex stans ante ipsam crucem mediam, deposita mitra, dicit:
Oremus.
Adesto, quaesumus, Domine Deus, obsequiis nostris, in nomine tuo
hunc locum visitantibus, et nostrae fragilitatis ministerio; et sicut
benedixisti per manus servorum tuorum Abrahae, Isaac et Jacob terram sepulturae
suae peregrinantibus, ita, quaesumus, Domine, bene + dicere,
sancti + ficare, et conse + crare
digneris hoc coemiterium pretio unigeniti Filii tui Domini nostri Jesu Christi
Sanguinis typice comparatum, ad nostrae peregrinationis corpora quiescenda,
donec per eumdem Dominum nostrum Jesum Christum de pulvere ad gloriam dones
resurgenda. Qui tecum vivit, et regnat in unitate Spiritus Sancti Deus.
Deinde mediocri voce, extensis manibus ante pectus, dicit Praefationem:
Per omnia saecula saeculorum. R. Amen.
V. Dominus vobiscum.
R. Et
cum spiritu tuo.
V. Sursum corda.
R. Habemus
ad Dominum.
V. Gratias agamus Domino Deo nostro.
R.
Dignum
et justum est.
Vere dignum et justum est, aequum et salutare, nos tibi semper, et ubique gratias agere, Domine sancte, Pater omnipotens, aeterne Deus: per Christum Dominum nostrum. Qui est dies aeternus, lux indeficiens, claritas sempiterna. Qui sic sequaces suos in lucem praecipit ambulare, ut noctis aeternae valeant caliginem evadere, et ad lucis patriam feliciter pervenire. Qui per humanitatem assumptam Lazarum flevit, per divinitatis potentiam vitae reddidit, atque humanum genus, quadrifida peccatorum mole obrutum, ad vitam reduxit. Per quem te, Domine, suppliciter deprecamur, ut qui in hoc sepelientur polyandro, in novissimo, cum tubae perstrepuerint Angelorum, a peccatorum nexibus absoluti, et aeternae felicitati redditi, et Sanctorum coetibus connumerati, te, qui es vita aeterna, benignum et misericordem inveniant, ut te auctorem vitae exsultantes cum omnibus Sanctis collaudent.
Quod sequitur dicit submissa voce legendo, ita tamen, quod a circumstantibus audiatur.
Per eumdem Dominum nostrum Jesum Christum Filium tuum, qui tecum vivit, et regnat in unitate Spiritus Sancti Deus, per omnia saecula saeculorum. R. Amen.
Tum thurificat crucem ipsam, et figit in summitate ejus unam de tribus candelis ardentibus, et alias duas in duobus brachiis ejusdem crucis. Quo facto, stans versus ad ipsam crucem, dicit: Oremus.
Et ministri: Flectamus genua. R. Levate.
Domine sancte Pater omnipotens, aeterne Deus, locorum omnium sanctificator, et in melius reformator, a quo et per quem omnis benedictio de coelis descendit in terras; bene + dicere dignare locum istum, ut sit polyandrum seu coemeterium, dulcis requies et pausatio mortuorum; quorum animae, quarum corpora hic sepulta, vel sepelienda sunt, jucunditatis tuae dulcedine potiantur; sintque interim in superna Jerusalem gaudentes et laetantes, donec in magno judicii die de sepulcris propria corpora recipiant, et sic venienti Domino ad judicandum obviam cum fructu bonae operationis occurrant. Per Dominum nostrum Jesum Christum Filium tuum, qui tecum vivit, et regnat in unitate Spiritus Sancti Deus, per omnia saecula saeculorum. R. Amen.
His peractis, Pontifex solemniter benedicit populo, dicens: Sit nomen Domini benedictum, etc.
Deinde intrat Ecclesiam, et, si velit, parat se ad Missam: si vero celebrare noluerit, facit per aliquem Sacerdotem solemniter celebrari.
Missa dicitur de die, et cum Oratione diei dicitur sub uno Per Dominum nostrum, sequens Oratio:
Deus, cujus miseratione animae fidelium requiescunt, huic coemeterio, quaesumus, Domine, Angelum tuum sanctum deputa custodem; et quorum quarumque corpora hic sepeliuntur, animas eorum ab omnibus absolve vinculis delictorum, ut in te semper cum Sanctis tuis sine fine laetentur. Per Dominum nostrum Jesum Christum Filium tuum, qui tecum vivit, et regnat in unitate Spiritus Sancti Deus, per omnia saecula saeculorum. R. Amen.
Cum Secreta diei dicitur sub uno Qui vivis, sequens Secreta:
Munera, Domine, oblata sanctifica, et qui te ipsum in sepulcro poni voluisti, et exemplum resurgendi fidelibus tuis largiri dignatus es, da, quaesumus, fidelium tuorum animabus hic in te quiescentibus, veniam peccatorum; ut haec salutaris hostia sit remedium et requies animarum eorum, et corporum. Qui vivis, et regnas cum Deo Patre in unitate Spiritus Sancti Deus, per omnia saecula saeculorum. R. Amen.
Cum Postcommunio diei dicitur sub uno Per Dominum nostrum, sequens Postcommunio:
Muneribus sacris satiati, quaesumus, Domine Deus noster, ut plebs tua, quae in futuro a morte corporis resurrectura creditur, te miserante, a morte animae resurgere mereatur. Per Dominum nostrum Jesum Christum Filium tuum, qui tecum vivit, et regnat in unitate Spiritus Sancti Deus, per omnia saecula saeculorum. R. Amen.