Pontifex stans sine mitra, dicit:
V. Adjutorium nostrum in nomine
Domini.
R. Qui fecit coelum et terram.
V. Dominus vobiscum.
R. Et cum spiritu tuo.
Oremus.
Omnipotens sempiterne Deus, qui Sanctorum tuorum imagines seu
effigies sculpi aut pingi non reprobas, ut quoties illas oculis
corporis intuemur, toties eorum actus et sanctitatem ad imitandum
memoriae oculis meditemur, hanc, quaesumus, imaginem, seu
sculpturam in honorem, et memoriam beati N.
Apostoli tui, vel Martyris, vel Confessoris, aut
Pontificis, vel Virginis
adaptatam bene + dicere et sancti + ficare digneris; et praesta, ut
quicumque coram illa ipsum gloriosissimum Apostolum tuum, vel Martyrem, vel
Confessorem, aut Pontificem, vel Virginem suppliciter colere et
honorare studuerit, illius precibus ac obtentu, a te gratiam in
praesenti, et aeternam gloriam obtineat in futurum. Per Dominum
nostrum Jesum Christum Filium tuum, qui tecum vivit et regnat in
unitate Spiritus Sancti Deus, per omnia saecula saeculorum. R. Amen.
Ultimo aspergit eas aqua benedicta.