Pontifex capsas pro Reliquiis, et aliis sanctuariis includendis, benedicere volens, stans cum mitra, dicit:
V. Adjutorium nostrum in nomine
Domini.
R. Qui fecit coelum et terram.
Oremus, dilectissimi nobis, Deum Patrem omnipotentem, ut qui omnia per unigenitum Filium suum in virtute Spiritus Sancti valde bona creavit, ipse nobis indignus ad consecrationem harum capsarum Reliquiis Sanctorum suorum condendis paratarum, rorem gratiae suae clementer infundere dignetur. Per Dominum nostrum Jesum Christum Filium tuum, qui tecum vivit et regnat in unitate Spiritus Sancti Deus.
Deinde, deposita mitra, extensis manibus ante pectus, dicit Praefationem.
Per omnia saecula saeculorum.
R. Amen.
V. Dominus vobiscum.
R. Et cum spiritu tuo.
V. Sursum corda.
R. Habemus ad Dominum.
V. Gratias agamus Domino Deo nostro.
R. Dignum et justum est.
Vere dignum et justum est, aequum et salutare, nos tibi semper et ubique gratias agere, Domine sancte, Pater omnipotens, aeterne Deus inaestimabilis, Deus ineffabilis, Deus misericordiarum, et totius consolationis. Qui Moysi famulo tuo praecepisti, ut juxta exemplar quod ei in monte demonstrasti, arcam de lignis imputribilibus construeret, et eam auro mundissimo circumdaret, in qua urna aurea manna coelesti plena, cum tabulis testamenti digito majestatis tuae conscriptis, in testimonium futuris generationibus servari deberet. Quique nostris saeculis eadem sacratius intelligenda manifestasti, dum corpus unici Filii tui, opere Spiritus Sancti de incorrupta Virgine conceptum, et anima rationali vivificatum, omni plenitudine divinitatis replesti: te suppliciter imploramus, omnipotens Deus, Pater Domini nostri Jesu Christi, ex quo omnis peternitas in coelo et in terra nominatur, ut haec vascula Sanctorum tuorum pignoribus praeparata, eisdem Sanctis tuis intercedentibus, coelesti bene + dictione perfundere digneris; quatenus qui horum patrocinia requirunt, ipsis intercedentibus, cuncta sibi adversantia, te adjuvante, superare, et omnia commode profutura, abundantia largitatis tuae mereantur invenire. Et sicut illi, te, Domine, inspirante, spiritualium nequitiarum versutias cavere, et humanitus exquisita tormenta non solum contemnere, sed etiam penitus evincere, Christo Domino confortante, potuerunt; ita ipsorum merita venerantibus, et Reliquias humiliter amplectentibus, contra diabolum, et angelos ejus, contra fulmina et tempestates, contra grandines, et varias pestes, contra corruptum aerem, et mortes hominum, vel animalium, contra fures et latrones, sive gentium incursiones, contra malas bestias, et serpentium, ac reptantium diversissimas formas, contra malorum hominum adinventiones pessimas, eorumdem Sanctorum tuorum precibus complactus, dexteram invictae potentiae tuae ad depulsionem nocivorum et largitatem proficuorum semper et ubique propitius extende.
Quod sequitur dicit submissa voce legendo, ita tamen quod a circumstantibus possit audiri.
Per eumdem Dominum nostrum Jesum Christum Filium tuum, qui tecum vivit et regnat in unitate Spiritus Sancti Deus, per omnia saecula saeculorum. R. Amen.
Tum adhuc stans sine mitra, dicit:
V. Dominus vobiscum.
R. Et cum spiritu tuo.
Oremus.
Domine, Deus omnipotens, qui ut murmur insani populi compesceres, et sacerdotium
Aaron tibi placitum comprobares, virgam ejus aridam germinare, et flores
fructiferos producere fecisti, eamdemque in arca testamenti pro signo virtutis
tuae poni jussisti; sed et nobis eodem praesagio Christum in ara crucis
arefactum, tertia die resurrectione reflorescere, et in Ecclesia novissimo
tempore resuscitanda, per mortem suam die ac nocte fructificare demonstrasti; te,
quaesumu, indulgentissime generis humani provisor, ut haec vascula Sanctorum
tuorum receptaculo praeparata, ita gratuita gratia sanctifices, ut ubicumque in
tuo nomine perlata fuerint, intercedentibus habitatorum ipsorum meritis, cuncta
adversa repellas, et nullifices, et omnia utilia multiplices atque custodias;
quatenus fideles tui magnitudine sive universitate beneficiorum tuorum, in parte
modica Reliquiarum, integra Sanctorum corpora se percepisse gratulentur; et per
temporalia loca ipsorum precibus impensa, ad aeterna cum eis gaudia possidenda
fiducialius animentur. Per eumdem Dominum nostrum Jesum
Christum Filium tuum, qui tecum vivit et regnat in unitate
Spiritus Sancti Deus, per omnia saecula saeculorum. R. Amen.
Tum aspergit eas aqua benedicta.
| Title Page | Index Generalis | Index Alphabeticus |