Pontifex apostatam, schismaticum, vel haereticum reconciliare volens, paratus amictu, stola, pluviali albo, et mitra simplici, sedet super faldistorium ante foras Ecclesiae sibi paratum, coram quo genuflectit reconciliandus, quem interrogat Pontifex de fide, dicens:
Credis duodecim Articulos Fidei?
Ille respondet: Credo.
Pontifex interrogat: Credis
in Deum Patrem omnipotentem, creatorem coeli et terrae?
Ille respondet: Credo.
Pontifex interrogat: Credis
et in Jesum Christum Filium ejus unicum Dominum nostrum?
Ille respondet: Credo.
Pontifex interrogat: Credis
quod conceptus est de Spiritu Sancto, natus ex Maria Virgine?
Ille respondet: Credo.
Pontifex interrogat: Credis
quod passus est sub Pontio Pilato, crucifixus, mortuus, et
sepultus?
Ille respondet: Credo.
Pontifex interrogat: Credis
quod descendit ad inferos?
Ille respondet: Credo.
Pontifex interrogat: Credis
quod tertia die resurrexit a mortuis?
Ille respondet: Credo.
Pontifex interrogat: Credis,
quod ascendit ad coelos, et sedet ad dexteram Dei Patris
omnipotentis?
Ille respondet: Credo
Pontifex interrogat: Credis
quod venturus est judicare vivos, et mortuos?
Ille respondet: Credo.
Pontifex interrogat: Credis
in Spiritum Sanctus?
Ille respondet: Credo.
Pontifex interrogat: Credis
sanctam Ecclesiam Catholicam, Sanctorum communionem?
Ille respondet: Credo.
Pontifex interrogat: Credis
remissionem omnium peccatorum?
Ille respondet: Credo.
Pontifex interrogat: Credis
carnis resurrectionem et vitam aeternam?
Ille respondet: Credo.
Deinde Pontifex surgit cum mitra, et super illum genuflexum dicit absolute, incipiens:
Exorcizo te, immunde spiritus, per Deum Patrem omnipotentem, et per Jesum Christum Filium ejus, et per Spiritum Sanctum, ut recedas ab hoc famulo Dei, quem Deus et Dominus noster ab erroribus et perceptionis tuis liberare, et ad sanctam matrem Ecclesiam Catholicam atque Apostolicam revocare dignatur. Ipse tibi imperet, maledicte ac damnate, qui pro salute hominum passus, mortuus, et sepultus est, te atque omnes vires tuas superavit, ac resurgens coelos ascendit, inde venturus judicare vivos et mortuos, et saeculum per ignem.
Tunc signat illum cum pollice dexterae manus in fronte signo crucis, dicens:
Accipe signum crucis Christi, atque Christianitatis, quod prius acceptum non custodivisti, sed male deceptus abnegasti.
Deinde surgit ille, et Pontifex retenta mitra, sinista sua illum apprehendit per manum dexteram, dicens:
Ingredere in Ecclesiam Dei, a qua incaute aberrasti; ac evasisse te laqueos mortis agnosce; horresce idola; respue omne pravitatem, sive superstitionem haereticam, vel gentilem, aut judaicam. Cole Deum Patrem omnipotentem, et Jesum Christum Filium ejus, et Spiritum Sanctum, unum, vivum, et verum Deum, sanctam, et individuam Trinitatem.
Tum introducit illum in Ecclesiam per manum, ut eum apprehendit, usque ad altare majus, coram quo in infimo gradu ille genuflectit. Pontifex vero ascendit ad medium altaris, ubi deposita mitra, stans versus ad illum, dicti absolute:
Omnipotens sempiterne Deus, hanc ovem tuam de faucibus lupi tua virtute subtractam, paterna recipe pietate, et gregi tuo reforma pia benignitate; ne de familiae tuae damno inimicus exsultet, se de conversione et liberatione ejus, Ecclesia tua ut pia mater de filio reperto gratuletur. Per Christum Dominum nostrum. R. Amen.
Oremus.
Deus, qui hominem ad imaginem tuam conditum misericorditer
reparas, quem mirabiliter creasti; respice propitius super hunc
famulum tuum, ut, quod hujus ignorantiae caecitate, hostili et
diabolica fraude surreptum est, indulgentiae tuae pietatis
ignoscat, et absolvat; et altaribus sacris, recepta veritatis
tuae communione, reddatur. Per Christum Dominum nostrum. R. Amen.
Deinde sedet ibidem Pontifex super faldistoriuo, et, accepta mitra, interrogat illum iterum de Fide Catholica, dicens:
Credis in Deum Patrem omnipotentem, creatorem
coeli, et terrae?
Respondet ille: Credo
Interrogatio: Credis
et in Jesum Christum ejus Filium unicum, Dominum nostrum, natum,
et passum?
Respondet: Credo
Interrogatio: Credis
et in Spiritum Sanctum, sanctam Ecclesiam Catholicam, Sanctorum
communionem, remissionem peccatorum, carnis resurrectionem, et
vitam aeternam post mortem?
Respondet: Credo
Postea interrogat Pontifex:
Homo, abrenuntias satanae, et angelis ejus?
Respondet: Abrenuntio.
Interrogatio: Abrenuntio
etiam omni sectae gentilitatis, vel haereticae pravitatis, sive
judaicae superstitionis?
Respondet: Abrenuntio.
Interrogatio: Vis
esse, et vivere in unitate sanctae Fidei Catholicae?
Respondet: Volo.
Tunc, deposita mitra, surgit Pontifex, et reconciliatus accedit ad pedes ejus, coram eo genuflectens, Pontifex vero imponit manum dexteram super caput illius, dicens:
Oremus.
Domine Deus omnipotens, Pater Domini nostri Jesu Christi, qui
dignatus es hunc famulum tuum ab errore gentilitatis, vel mendacio haereticae pravitatis, sive judaicae superstitionis clementer
eruere, et ad Ecclesiam tuam sanctam revocare; tu, Domine, emitte
in eum Spiritum Sanctum Paraclitum de coelis. R. Amen.
Spiritum sapientiae et intellectus. R. Amen.
Spiritum consilii et fortitudinis. R. Amen.
Spiritum scientiae et pietatis. R. Amen.
Adimple eum lumine splendoris tui, et in nomine ejusdem Domini
nostri Jesu Christi signetur signo cru +
cis in vitam aeternam. R. Amen.
Post haec, si reconciliatus sit is qui praecipuus et notabilis fautor schismatis exsistit, genuflexus, ut supra, facit publice professionem, et adjurationem, Pontifice cum mitra in faldistorio ante altare sedente, dicens:
Ego N. comperto divisionis laqueo quo tenebar, diutina mecum deliberatione pertractans, prona et spontanea voluntate ad unitatem Sedis Apostolicae, divina gratia duce, reversus sum: ne vero non pura mente, seu simulata reversus estimer, spondeo sub ordinis mei casu, et anathematis obligatione, atque promitto tibi, tali Episcopo, et per te sancto Petro Apostolorum principi, atque sanctissimo in Christo Patri, et Domino nostro, Domino N. Papae N. et successoribus suis, me umquam quorumlibet suasionibus, vel quocumque alio modo, ad schisma, de quo Redemptoris nostri gratia liberatione ereptus sum, reversurum, sed semper in unitate Ecclesiae Catholicae, et in communione Romani Pontificis per omnia permansurum: unde jurans dico per Deum omnipotentem, et sancta Dei Evangelia, me in unitate et communione praemissis inconcusse mansurum. Et si (quod absit) ab hac me unitate aliqua occasione, vel argumento divisero, perjurii reatum incurrens aeternae obligatus poenae inveniar, et cum auctore schismatis habeam in futuro saeculo portionem.
Deinde super librum Evangeliorum, quem Pontifex ante se tenet apertum, ponit ambas manus extensas, junctis digitis, dicens:
Sic me Deus adjuvet, et haec sancta Dei Evangelia.
Tum producto per Pontificem signo crucis super reconciliatum, surgit reconciliatus et discedit.
Si vero reconciliatus fuerat haeresiarcha, seu praecipuus auctor alicujus haeresis, omissa promissione praecedente, facit sequentem, genuflexus coram Pontifice cum mitra in faldistorio ante altare sedente, dicens:
Ego N. cognoscens veram Catholicam, et Apostolicam Fidem, anathematizo hic publice omnem haeresim, praecipue illam de qua hactenus exsisti infamatus, quae astruere conatur hoc, vel illud. Consentio autem sanctae Romanae Ecclesiae; et Apostolicae Sedi ore et corde profiteor me credere sic, vel sic, et eamdem Fidem tenere, quam sancta Romana Ecclesia auctoritate Evangelica et Apostolica tenendam tradit. Jurans hoc per sanctam homousion, id est, ejusdem substantiae Trinitatem; per sancrosancta Evangelia Christi; eos autem, qui contra Fidem hanc venerint, cum dogmatibus et sectatoribus suis aeterno anathemate dignos esse pronuntio. Et si ego ipse (quod absit) aliquando contra haec aliquid assentiri, aut praedicare praesumpsero, canonum severitati subjaceam.
Et mox ambas manus extensas, digitas non disjunctis, ponit super librum Evangeliorum, quem Pontifex ante se apertum tenet, dicens:
Sic me Deus adjuvet, et haec sancta Dei Evangelia.
Tum producto per Pontificem signo crucis super reconciliatum, surgit ipse reconciliatus et discedit.