Pontifex induet amictum, albam, cingulum, stolam et pluviale albi coloris, accipiens mitram simplicem in capite, et baculum pastorale in manu sinistra: Diaconus et Subdiaconus, similiter induti paramenta albi coloris, Acolythi et alii ministri superpelliceis parati adsint. Paretur quoque vas cum aqua benedicta, ac thus et thuribulum cum igne.
Pontifex cum ministris accedit ad altare majus Ecclesiae, et deposito baculo pastorali, stans sine mitra, inchoat, et schola cantorum prosequitur Antiphonam:
Adesto, Deus unus * omnipotens, Pater, Filius, et Spiritus Sanctus.
Deinde dicit:
Oremus.
Actiones nostras, quaesumus, Domine, aspirando praeveni et adjuvando prosequere,
ut cuncta nostra oratio et operatio a te semper incipiat, et per te coepta
finiatur. Per Christum Dominum nostrum. R. Amen.
Qua oratione dicta, aspergit se et circumstantes aqua benedicta, inchoans, schola prosequente, Antiphonam:
Asperges me, * Domine, hyssopo, et mundabor: lavabis me, et super nivem dealbabor.
Tunc, imposita sibi mitra, pergit ad fores Ecclesiae cum ministris, praecedentibus duobus acolythis cum candelis accensis, et incipit circuire ad manum dexteram, procedens cum Clero et populo, et aspergens cum ipsa aqua forinsecus parietes frontis Ecclesiae in superiori parte eorum, juxta fundamentum, et in media parte eorum, idest, circa altitudinem faciei suae, dicens semper:
In nomine Pa + tris, et Fi + lii, et Spiritus + Sancti.
Expleto circuitu, cum Pontifex pervenerit ante ostium, stans ibidem versus ad illud, deposito aspersorio et mitra, dicit:
Oremus.
Bene + dic, Domine, hanc novam
Ecclesiae frontem, et praesta per invocationem sancti tui nominis, ut quicumque
eamdem Ecclesiam pura mente ingressi fuerint, corporis sanitatem et animae
medelam percipiant. Per Christum Dominum nostrum. R. Amen.
Postea stans benedicit Crucem in frontem Ecclesiae collocatam vel collocandam.
V. Adjutorium nostrum in nomine Domini.
R. Qui fecit coelum et terram.
V. Dominus vobiscum.
R. Et
cum spiritu tuo.
Oremus.
Bene + dic, Domine Jesu Christe,
hanc Crucem tuam, per quam eripuisti mundum a potestate diaboli, et superasti
Passione tua suggestorem peccati, qui gaudebat in praevaricatione primi hominis
per ligni vetiti sumptionem: Qui cum Deo Patre et Spiritu Sancto vivis et regnas
in saecula saeculorum. R. Amen.
Oremus.
Sancti + fica, Domine Jesu Christe,
signaculum istud Passionis tuae, ut sit inimicis tuis obstaculum, et credentibus
in te perpetuum efficiatur victoriae vexillum: Qui cum Deo Patre vivis et regnas
in unitate Spiritus Sancti Deus per omnia saecula saeculorum. R. Amen.
Tunc offertur Pontifici thus in navicula, quod Pontifex stans sine mitra benedicit, dicens:
Oremus.
Domine Deus omnipotens, cui assistit exercitus Angelorum cum
tremore, quorum servitium spirituale et igneum esse cognoscitur: dignare
respicere, bene + dicere, et sancti +
ficare hanc creaturam incensi, ut omnes languores omnesque infirmitates
atque insidiae inimici odorem ejus sentientes effugiant, et separentur a
plasmate tuo; ut numquam laedatur a morsu antiqui serpentis, quod pretioso Filii
tui Sanguine redemisti. Per eumdem Christum Dominum nostrum. R. Amen.
Quo facto Pontifex imponit thus in thuribulum: deinde aspergit Crucem aqua benedicta, et mox eam incensat.
Demum Pontifex flexis genibus ante Crucem, eam devote adorat una cum Clero et populo.
Postea caementarii locant Crucem super Frontem templi, si ea non sit jam collocata; interim Pontifex Ecclesiam ingreditur, canente schola cantorum Antiphonam:
Attollite portas, principes, vestras, et elevamini, portae aeternales: et introibit Rex gloriae.
Psalmus 23.
Domini est terra, et plenitudo ejus: * orbis terrarum, et universi qui
habitant in eo.
Quia ipse super maria fundavit eum: * et super flumina praeparavit eum.
Quis acendet in montem Domini: * aut quis stabit in loco sancto ejus?
Innocens manibus, et mundo corde: * qui non accepit in vano animam suam, nec
juravit in dolo proximo suo.
Hic accipiet benedictionem a Domino, * et misericordiam a Deo salutari suo.
Haec est generatio quaerentium eum: * quaerentium faciem Dei Jacob.
Attollite portas, principes, vestras, et elevamini portae aeternales: * et
introibit rex gloriae.
Quis est iste rex gloriae? * Dominus fortis et potens, Dominus potens in proelio.
Attollite portas, principes, vestras, et elevamini portae aeternales: * et
introibit rex gloriae.
Quis est iste rex gloriae? * Dominus virtutum ipse est rex gloriae.
Gloria Patri, et Filio: * et Spiritui Sancto.
Sicut erat in principio, et nunc et semper: * et in saecula saeculorum. Amen.
Quo Psalmo absoluto, pergit Pontifex ad Altare, et illud ascendens more solito benedicit populo.
| Title Page | Index Alphabeticus |