Pontifex indutus pluviali albi coloris et mitra, pergit ad altare, praecedente Clero, ibique sistens in plano Cruci profunde inclinat: deinde ascendit super predellam et, deposita mitra, coronas super mensam altaris positas benedicit, dicens:
Sub tuum praesidium confugimus, Sancta Dei Genetrix, nostras deprecationes ne despicias in necessitatibus nostris; sed a periculis cunctis libera nos semper, Virgo gloriosa et benedicta.
V. Adjutorium nostrum in nomine Domini.
R. Qui fecit coelum et terram.
V. Dominus vobiscum.
R. Et
cum spiritu tuo.
Oremus.
Omnipotens sempiterne Deus, cujus clementissima dispensatione
cuncta creata sunt ex nihilo, Majestatem tuam supplices deprecamur: ut has
Coronas pro ornatu Sacrae Imaginis Unigeniti Filii tui Domini nostri Jesu
Christi, et ejusdem Genetricis Beatissimae Virginis Mariae fabricatas bene +
dicere, et sanct + ficare digneris. Per
eumdem Christum Dominum nostrum. R. Amen.
Si una tantum corona benedicenda sit, loco praedictae orationis dicatur sequens:
Omnipotens sempiterne Deus, cujus clementissima dispensatione cuncta creata sunt ex nihilo, Majestatem tuam supplices deprecamur; ut hanc Coronam pro ornatu Sacrae Imaginis Beatissimae Virginis Mariae fabricatam bene + dicere, et sanct + ficare digneris. Per Christum Dominum nostrum. R. Amen.
Pontifex deinde sedens imponit incensum in thuribulo, illud more solito benedicens: tum surgens aspergit coronas aqua benedicta, et illas thurificat.
Inde, accepta mitra, descendit, et ante Altare genuflexus intonabit Antiphonam:
Regina coeli, laetare, alleluia:
quia quem meruisti portare, alleluia,
resurrexit sicut dixit, alleluia.
Ora pro nobis Deum, alleluia.
Quam cantores modulatis vocibus prosequentur.
Interim Pontifex surgens, et mitra ornatus paratos gradus ascendet. Ante Sacram Imaginem mitram deponit, et accepta una ex Coronis accedat propius, et Caput Imaginis D. N. Jesu Christ eadem Corona ornabit dicens:
Sicuti per manus nostras coronaris in terris; ita et a Te gloria, atque honore coronari mereamur in coelis.
Quando alia Corona benedicenda non sit, absoluta Antiphona Regina coeli, Pontifex, omissa praedicta formula, Sicuti per manus, etc., pro coronatione Imaginis pueruli Jesu, accipit Coronam benedictam, et sequentem tantum recitat formulam:
Sicuti per manus nostras coronaris in terris, ita et per Te a Jesu Christo filio Tuo gloria, atque honore coronari mereamur in coelis.
His expletis, Pontifex descendet cum mitra, et ante Altare, deposita mitra, imponet thus in thuribulo, eoque benedicto, Sacram Imaginem stans triplici ductu thurificabit.
Deinde subdet:
V. Corona aurea super caput ejus.
R. Expressa signo sanctitatis, gloria honoris, et opus
fortitudinis.
V. Coronasti Eam, Domine.
R. Et constituisti Eam super opera manuum tuarum.
Oremus.
Praesta, misericors Pater, per invocationem Genetricis Unigeniti
Filii tui Domini nostri Jesu Christi, quem pro salute generis humani,
integritate Virginis Mariae servata, carnem sumere voluisti, quatenus precibus
ejusdem Sacratissimae Virginis, quicumque eamdem misericordiae Reginam, et
gratiosissimam Dominam nostram coram hac Imagine suppliciter honorare studuerint;
et de instantibus periculis eruantur, et in conspectu divinae Majestatis tuae de
commissis, et omissis veniam impetrent, ac mereantur in praesenti gratiam
quam desiderant adipisci, et in futuro perpetua salvatione cum electis tuis
valeant gratulari. Per eumdem Christum Dominum nostrum. R. Amen.
Tum intonabit Hymnum:
Te Deum laudamus.
Te Dominum confitemur.
Te aeternum Patrem * omnis terra veneratur.
Tibi omnes Angeli, * tibi coeli et universae potestates.
Tibi Cherubim et Seraphim * incessabili voce proclamant:
Sanctus,
Sanctus,
Sanctus * Dominus Deus Sabaoth.
Pleni sunt coeli et terra * majestatis gloriae tuae.
Te gloriosus * Apostolorum chorus,
Te Prophetarum * laudabilis numerus,
Te Martyrum candidatus * laudat exercitus.
Te per orbem terrarum * sancta confitetur Ecclesia.
Patrem * immensae majestatis.
Venerandum tuum verum * et unicum Filium.
Sanctum quoque * paraclitum Spiritum.
Tu Rex gloriae * Christe.
Tu Patris * sempiternus es Filius.
Tu ad liberandum suscepturus hominem, * non horruisti Virginis uterum.
Tu, devicto mortis aculeo, * aperuisti credentibus regna coelorum.
Tu ad dexteram Dei sedes * in gloria Patris.
Judex crederis * esse venturus.
Te ergo, quaesumus, tuis famulis subveni, * quos pretioso sanguine redemisti.
Aeterna fac cum Sanctis tuis * in gloria numerari.
Salvum fac populum tuum, Domine, * et benedic haereditati tuae.
Et rege eos, * et extolle illos usque in aeternum.
Per singulos dies * benedicimus te.
Et laudamus nomen tuum in saeculum, * et in saeculum saeculi.
Dignare, Domine, die isto * sine peccato nos custodire.
Miserere nostri, Domine, * miserere nostri.
Fiat misericordia tua, Domine, super nos; * quemadmodum speravimus in te.
In te, Domine, speravi; * non confundar in aeternum.
V. Dominus vobiscum.
R. Et
cum spiritu tuo.
Oremus.
Deus, cujus misericordiae non est numerus, et bonitatis infinitus
est thesaurus: piissimae Majestati tuae pro collatis donis gratias agimus, tuam
semper clementiam exorantes; ut, qui petentibus postulata concedis, eosdem non
deserens, ad praemia futura disponas. Per Christum Dominum nostrum. R. Amen.
Si Pontifex Missam celebrare voluerit, post Orationem Placeat, intonat in gratiarum actionem hymnum Te Deum, etc., et postea fidelibus adstantibus solemniter benedicit; deinde, publicata Indulgentia, si a Summo Pontifice concessa fuerit, juxta verba in Litteris Apostolicis expressa, Pontifex recitat more solito, Evangelium S. Joannis.
Si per triduum aut per octiduum solemnitas protrahatur, hymnus Te Deum, ultima tantum functionum die cantabitur.